Kosova dhe Austria përforcojnë marrëdhëniet ekonomike
Prishtinë, 14.09.2021 – Ministrja e Ekonomisë, Artane Rizvanolli së bashku me kryeministrin e Republikës së Kosovës, Albin Kurtin kanë pritur delegacionin ekonomik austriak.
Gjatë këtij takimi u diskutua për vazhdimësinë e marrëdhënieve ekonomike ndërmjet Kosovës dhe Austrisë si dhe mundësitë e angazhimit ekonomik.
Ndër të tjera në këtë takim është folur për prioritetet e qeverisë për zhvillimin e Kosovës, ku kryeministri potencoi disa nga faktorët që i ka Kosova me rëndësi të veçantë për investitorët dhe bizneset, si: siguria e investimeve, respektivisht sundimi i ligjit, fuqia punëtore si dhe lokacioni strategjik me infrastrukturë të zhvilluar.
“Shpresojmë të rrisim vëllimin e investimeve austriake, duke punuar ngushtë së bashku me dhomën austriake të biznesit këtu në Kosovë. Sidomos në dhënien e shërbimeve të teknologjisë së informacionit dhe komunikimit, përpunimin e drurit si dhe me potencialin e madh të pashfrytëzuar që ka Kosova në fushën e turizmit, mund të krijohen sinergji të reja,” tha kryeministri Kurti.
Nga ana e tyre, përfaqësuesit e delegacionit ekonomik austriak u shprehën të kënaqur me avancimin e marrëdhënieve ekonomike ndërmjet Kosovës dhe Austrisë, që është investitori i katërt më i madh në vend.