Shqipëria ndihmon Kosovën në anëtarësimin në EITI
Delegacioni i MZHE-së në përbërje të këshilltarëve të ministrit Gazmend Ahmeti dhe Genc Hajdini si dhe zyrtarëve të MZHE-se, Kemajl Zeqiri përgjegjës për Nismën e Anëtarësimit në EITI dhe Besim Veselaj udhëheqës i Divizionit të Strategjive Sektoriale, u pritën nga drejtuesit e sekretariatit të ALBEITI-së Shkëlqim Hysaj dhe Agim Shehu Koordinator Ekonomik si dhe nga disa anëtarë të Grupit të Punës (MSG) përfaqësues të Ministrisë Energjisë dhe Industrisë ( MEI ) dhe të Shoqërisë Civile.
Në këtë takim u diskutua lidhur me eksperiencën dhe sfidat e Shqipërisë në procesin e anëtarësimit, konkretisht lidhur me punën e sekretariatit shqiptarë për anëtarësim në EITI (ALBEITI), si dhe punën e grupit gjithëpërfshirës punues (MSG).
Veç tjerash në këtë takim u trajtuan dhe u dhanë njohuritë bazë për parimet dhe kriteret kryesore të EITI si një standard global që promovon transparencën e të ardhurave të krijuara dhe të paguara për shtetin nga industria nxjerrëse, mirëqeverisjen dhe llogaridhënien në këtë sektor.
Po ashtu, në këtë takim me theks të veçantë u diskutua për interesimin e vendeve të ndryshme të Evropës dhe Botës pas Konferencës së 6-të Globale EITI për të njohur Nismën për Transparencë në Industrinë Nxjerrëse (EITI) , përfshirë edhe vendet me nivel të lartë të demokracisë dhe të zhvillimit ekonomik siç është Mbretëria e Bashkuar, Franca etj.
Të dy delegacionet u pajtuan për të thelluar bashkëpunimin, ndërsa sekretariati shqiptar ALBEITI, shprehi gatishmërinë për të mbështetur procesin e anëtarësimit të Kosovës në EITI, përmes bashkëpunimit dhe ofrimit të asistencës së tyre në gjitha fazat e procesit.