Prishtinë, 01.06.2025 – Ministria e Ekonomisë ka shënuar Ditën Ndërkombëtare të Fëmijëve përmes aktiviteteve edukative, kreative dhe ekologjike, me fokus në ndërgjegjësimin e fëmijëve për kursimin e energjisë elektrike, mbrojtjen e mjedisit dhe rëndësinë e burimeve të ripërtëritshme të energjisë.

Aktiviteti mblodhi fëmijët e punonjësve të Ministrisë së Ekonomisë, të cilët u shoqëruan nga ministrja në detyrë e Ekonomisë, Artane Rizvanolli, zëvendësministrja Triera Kasumi dhe Sekretarja e Përgjithshme, Leonita Shabani Mullarama.

Në kuadër të aktiviteteve të organizuara, fëmijët mbollën lule në hapësirat e Ministrisë së Ekonomisë, duke përcjellë mesazhin për rëndësinë e kujdesit ndaj natyrës dhe krijimit të një ambienti më të pastër dhe më të gjelbër.

Ministrja Rizvanolli theksoi se edukimi i fëmijëve për energjinë dhe mjedisin përbën një investim të rëndësishëm për të ardhmen e vendit, duke nxitur brezat e rinj të zhvillojnë sjellje të përgjegjshme ndaj burimeve natyrore dhe mjedisit.