Prizren, 14 maj 2026 – Sot u përuruan investimet e realizuara në tri ndërtesa shumë-banesore sociale në Komunën e Prizrenit, në kuadër të projektit “Zbatimi i Masave të Efiçiencës së Energjisë për Ndërtesat Shumë-Banesore Sociale”, projekti i Qeverisë së Kosovës, i financuar 90% nga Bashkimi Evropian dhe 10% nga komuna, i zbatuar nga Fondi i Kosovës për Efiçiencë të Energjisë.

Në ceremoninë e inaugurimit morën pjesë kryeministri në detyrë i Republikës së Kosovës, Albin Kurti, ministrja në detyrë e Ekonomisë, Artane Rizvanolli, Shefi i Seksionit të Bashkëpunimit të Bashkimi Evropian në Kosovë, Hubert Perr, Drejtoresha Menaxhuese e FKEE-së, Njomza Hoxha, si dhe përfaqësues nga komuna e Prizrenit.

Me këtë rast, përfaqësuesit institucionalë vlerësuan rëndësinë e investimeve në efiçiencë të energjisë si një kontribut i drejtpërdrejtë në përmirësimin e kushteve të jetesës për qytetarët, uljen e konsumit të energjisë dhe avancimin e objektivave të Kosovës për tranzicion të gjelbër dhe zhvillim të qëndrueshëm.

Kryeministri Kurti theksoi tha se nga realizimi i punimeve në këto objekte do të përfitojnë 51 familje që do të kenë kushte më të mira të jetesës.

“Në total këto ndërtesa kanë 4,855 metra katror hapësirë banimi, brenda të cilave tash ka familje që jetojnë më mirë, fëmijë që rriten në kushte më të mira, prindër që ndihen të sigurt dhe banorë të cilët e shohin se institucioni publik nuk është larg tyre, sepse për ne është e rëndësishme që investimet tona publike të jenë të dobishme për jetën e qytetarëve”, ka thënë ai.

Ministrja Rizvanolli bëri të ditur se këto tri ndërtesa janë pjesë e gjithsej 28 ndërtesave shumë-banesore sociale në 13 komuna të Kosovës që kanë përfituar nga ky projekt, me një vlerë totale investimi prej 6.6 milionë euro.

Nga ana e tij, Shefi i Seksionit të Bashkëpunimit të Bashkimit Evropian në Kosovë, Hubert Perr, theksoi se ky projekt përfaqëson një shembull konkret të bashkëpunimit ndërmjet Bashkimit Evropian dhe Kosovës në mbështetje të përmirësimit të jetesës për qytetarët e Kosovës, veçaniërisht të familjeve në nevojë.

Punimet e realizuara në këto ndërtesa përfshijnë izolimin e mureve të jashtme, ndërrimin e dritareve dhe dyerve hyrëse, termoizolimin e kulmit me renovimin e tjegullave dhe vendosjen e shtresave termo dhe hidroizoluese, instalimin e sistemit të ngrohjes me kondicionerë ajri, si dhe punë të tjera përcjellëse, përfshirë renovimin e hyrjeve, vendosjen e interfonisë dhe masat për mbrojtje kundër zjarrit.

Këto investime pritet të ndikojnë drejtpërdrejt në uljen e humbjeve të energjisë, reduktimin e kostove për ngrohje dhe energji elektrike, si dhe në përmirësimin e efiçiencës së energjisë të objekteve.

Vlera totale e investimit në këto tri ndërtesa arrin në 458 mijë e 645 euro. Nga ky projekt kanë përfituar 51 familje, prej të cilave 42 familje udhëhiqen nga gra.

Ky projekt është pjesë e angazhimeve të vazhdueshme të Qeverisë së Republikës së Kosvës dhe partnerëve ndërkombëtarë për të mbështetur sektorin rezidencial social dhe për të promovuar investime të qëndrueshme në infrastrukturë publike dhe sociale.