Prishtinë, 03.12.2025 – Në kuadër të fushatës globale “16 Ditët e Aktivizmit Kundër Dhunës me Bazë Gjinore”, zyrtarë të Ministrisë së Ekonomisë kanë zhvilluar ligjërata informuese në tri shkolla fillore të mesme të ulët të Prishtinës, me qëllim ndërgjegjësimin e nxënësve për rreziqet e dhunës digjitale dhe rëndësinë e sigurisë kibernetike.

Nxënësit e klasave të pesta dhe të gjashta të shkollave  të Mesme të Ulëta në Prishtinë u informuan mbi format e dhunës në internet, si bullizmi kibernetik, shpërndarja e paautorizuar e përmbajtjes, kërcënimet online dhe manipulimi digjital, të cilat kanë pasoja të rënda emocionale, sociale dhe psikologjike.

“Siguria kibernetike nuk është vetëm çështje teknologjie, por edhe çështje e mbrojtjes së dinjitetit dhe mirëqenies së fëmijëve. Çdo formë dhune online është dhunë reale dhe duhet trajtuar me seriozitet të plotë. Nxënësit duhet të dinë si të mbrohen dhe ku të kërkojnë ndihmë,” u tha gjatë ligjëratës.

Përmes këtyre aktiviteteve, Ministria e Ekonomisë synon të fuqizojë të fëmijët me njohuritë e nevojshme për të përdorur mjetet digjitale në mënyrë të sigurt, për të raportuar sjelljet e dëmshme dhe për të kontribuar në krijimin e një mjedisi online të respektueshëm dhe pa dhunë.

“16 Ditët e Aktivizmit Kundër Dhunës me Bazë Gjinore” zhvillohen çdo vit nga 25 nëntori, Dita Ndërkombëtare për Eliminimin e Dhunës ndaj Grave, deri më 10 dhjetor, Ditës Ndërkombëtare të të Drejtave të Njeriut.

Fushata mbetet një thirrje e fuqishme që dhuna me bazë gjinore përfshirë dhunën digjitale të trajtohet si urgjencë shoqërore dhe institucionale, duke kërkuar angazhim të përbashkët për një shoqëri më të sigurt, gjithëpërfshirëse dhe të barabartë.