Prishtinë, 18.11.2025 – Ka filluar faza e parë pilot e procesit zyrtar për pajisjen me identitet elektronik (eID), një hap i rëndësishëm në kuadër të Projektit Kosovo eID, i financuar nga Bashkimi Evropian përmes programit EU4Innovation. Ky projekt ka si qëllim përmirësimin e shërbimeve publike dhe krijimin e mundësive të reja për qytetarët dhe institucionet në Kosovë.

Ministria e Ekonomisë, si krijuese dhe koordinuese e implementimit të sistemit të eID-së në Kosovë, të premten realizoi me sukses procesin e regjistrimit dhe pajisjes me eID. Ky është një hap kyç drejt ofrimit të shërbimeve dixhitale të sigurta dhe efikase për qytetarët dhe institucionet në vend.

Platforma teknike është finalizuar plotësisht, duke përfshirë sistemin e regjistrimit të qytetarëve, aplikacionin zyrtar “Kosova e-Wallet” dhe modulin për nënshkrim elektronik.

Në sesionin e parë informues të mbajtur me stafin e ME-së u fol mbi përdorimin e aplikacionit “Kosova e-Wallet” që tashmë funksionon në pajisjet Android dhe iOS, përmes të cilit  qytetarët do të mund të kryejnë autentifikimin elektronik, të përdorin nënshkrimin elektronik dhe  vulën elektronike për nënshkrim, gjegjësisht vulosjen e dokumenteve elektronike.

Përfitimet e eID:

• Siguri dhe besueshmëri: Sistemi i eID-së është plotësisht në përputhje me standardet e Rregullores së eIDAS të BE-së dhe dispozitat e Ligjit Nr. 08/L-022 për Identifikimin Elektronik dhe Shërbimet e Besuara në Transaksionet Elektronike.
• Shërbime publike online: Qytetarët do të mund të identifikohen në mënyrë të sigurt në mjedise online, pa pasur nevojë për prezencë fizike dhe të nënshkruajnë dokumente në mënyrë elektronike.
• Përshpejtim i proceseve: Kosova po ndërton themelet për një administratë moderne dhe qeverisje dixhitale, duke mundësuar proceset më të shpejta dhe më efikase për qytetarët dhe institucionet.
• Përfshirje dixhitale: Kjo iniciativë do të krijojë kushte më të favorshme për zhvillimin ekonomik dhe përfshirjen dixhitale të çdo qytetari.

Në ditët në vijim do të vazhdojë procesi i pajisjes me ID elektronike nga zyrtarë të administratës shtetërore, ku pasi të përfundojë faza pilot, procesi i pajisjes me eID do të shtrihet në të gjithë vendin dhe do të bëhet i qasshëm për të gjithë qytetarët e Republikës së Kosovës.

Ky është vetëm një nga shumë hapat që Ministria e Ekonomisë po ndërmerr për të modernizuar administratën dhe për të ofruar shërbime më të mira dhe më të sigurta për qytetarët tanë.