Prishtinë, 23 dhjetor 2025 – Me pjesëmarrjen e Ministres së Ekonomisë, Artane Rizvanolli, sot u vendos gurthemeli i nënstacionit të ri 220/35/10(20) kV në Malishevë, një projekt strategjik për forcimin e infrastrukturës energjetike dhe rritjen e sigurisë së furnizimit me energji elektrike.

Në fjalën e saj, Ministrja Rizvanolli theksoi se, sot po fillojnë punimet në nënstacionin e ri në Malishevë në vlerë prej 6.8 milion euro,  investim ky që lidhë për herë të parë Malishevën në rrjetin 220 kV, që është ndryshim i kategorisë, jo vetëm për kapacitet më të larta, por edhe për punime të qëndrueshme dhe më të besueshme krahas rrjetit i cili gjithashtu është 35 kV.

“Unë e di që Malisheva ka pasur nevojë për këtë investim qysh moti. Problemet i keni që nga viti 2007, pra, kjo që po bëjmë sot, që po nisim sot, është përmirësim i një padrejtësie të gjatë për Malishevën.

Qysh në vitin 2021, kur e kemi marrë mandatin, e kemi ditur që Malisheva e ka këtë problem jashtëzakonisht të madh, dhe e kemi ngritur këtë çështje menjëherë, ku në vitin 2022 KOSTT-i e ka vendosur në plan pesëvjeçar të investimeve. Më pas në vitin 2023, KOSTT-i e ka tenderuar dhe kontraktuar dizajnin e projektit.

Pastaj në 2024-tën, e gjatë këtij viti është marrë leja ndërtimore e procedurat e tjera të nevojshme, dhe jam e lumtur që më në fund, kontrata është nënshkruar, para disa javësh, e sot po fillojnë punimet”, përfundoi Rizvanolli.

Projekti, i realizuar nga KOSTT parasheh ndërtimin e një nënstacioni modern me transformator 40 MVA dhe linjë të re kyçëse 220 kV, duke e lidhur për herë të parë Malishevën me rrjetin e tensionit të lartë.

Nënstacioni do të kontribuojë në përmirësimin e cilësisë së energjisë, uljen e humbjeve teknike dhe rritjen e sigurisë operacionale në nivel vendi, duke krijuar gjithashtu hapësirë për integrimin e burimeve të energjisë së ripërtëritshme.