Prishtinë, 29 maj 2025 – Me kërkesë të Qeverisë së Republikës së Kosovës, Këshilli Kombëtar për Ekonomi dhe Investime ka mbajtur takimin e radhës me bizneset të cilat pritet të dalin në tregun e hapur të energjisë elektrike si dhe furnizuesit e licencuar për furnizim me energji elektrike në Republikën e Kosovës. Në këtë takim morën pjesë Ministrja në detyrë e Ekonomisë, Artane Rizvanolli, Drejtori i Bordit të Zyrës së Rregullatorit për Energji (ZRrE), Ymer Fejzullahu, si dhe përfaqësues të odave ekonomike.

Pesë kompani që kanë licencë për furnizim me energji elektrike morën pjesë në diskutim dhe deklaruan se janë aktivë dhe të gatshëm të japin oferta për furnizim me energji elektrike.

Sipas njoftimeve që dhanë sot gjatë takimit, disa prej furnizuesve tashmë kanë dhënë oferta për biznese individuale ose kontrata me grupe biznesesh të organizuara së bashku. Një prej tyre tashmë ka nënshkruar kontrata me biznese ose grupe biznesesh të organizuara së bashku.

Kompanitë kryesisht planifikojnë të ofrojnë kontrata komerciale variabile, në bazë të kostove të tregut plus një marzhë të furnizuesit për shërbimin e ofruar, ndërsa 3 prej tyre janë të gatshëm të ofrojnë edhe kontrata me çmim fiks. Disa nga furnizuesit thanë se nëse bizneset organizohen në grupe për të negociuar e nënshkruar kontrata me ta, ata mund të përfitojnë nga çmimet më të lira. Ata, poashtu njoftuan se bursat prej nga furnizohen dallojnë mes tyre, dhe përfshijnë ALPEX, HUPX, etj.

Me këtë rast, ministrja në detyrë e Ekonomisë, Artane Rizvanolli bëri thirrje për të gjitha bizneset që janë pjesë e fazës së dytë të liberalizimit të tregut që të organizohen sa më parë për të arritur deri tek ofertat më të favorshme. Ajo gjithashtu i bëri thirrje ZRrE-së që të lehtësojë sa më shumë procesin e informimit në kohë me të dhënat e domosdoshme për bizneset dhe furnizuesit.