Podujevë, 04.02.2025 – Kryeministri në detyrë i Republikës së Kosovës, Albin Kurti, ministrja në detyrë e Ekonomisë, Artane Rizvanolli, kryetari i Komunës së Podujevës, Shpejtim Bulliqi, si dhe U.D. Ddrejtoresha e Fondit të Kosovës për Efiçiencë të Energjisë (FKEE), Ardiana Bokshi, morën pjesë në ceremoninë e përurimit të investimeve në efiçiencë të energjisë në Shkollën e Mesme Ekonomike “Isa Boletini” dhe në shkollën “Shefki Kuleta” në fshatin Tërnave të Podujevës.

Investimi është realizuar gjithsej në 8 shkolla në Komunën e Podujevës, në të cilat Qeveria e Republikës së Kosovës ka investuar 750 mijë euro, ndërsa me mbështetja e Bashkimit Evropian, arrin vlerën 1.5 milionë euro.

Në kuadër të këtyre investimeve është bërë ndërrimi i dyerve dhe dritareve, izolimi i kulmit dhe mureve, si dhe optimizimi i sistemit të ngrohjes me kapacitet prej 300 KW.

Me këtë rast, kryeministri Kurti theksoi se falë këtyre investimeve, në Shkollën e Mesme Ekonomike “Isa Boletini”, investimi në efiçiencë të energjisë elektrike është 350 mijë euro ku kushte më të mira do të kenë mbi 1,000 nxënës dhe rreth 100 mësimdhënës.

Ndërkaq 135 nxënës në Tërnavë të Podujevës, në shkollën “Shefki Kuleta”, do t’i gëzojnë të njëjtat investime në efiçiencë të energjisë, sepse Qeveria e Republikës së Kosovës mbështet me renovim të objekteve publike edhe fshatrat gjithandej, në mënyrë që të kemi kushte moderne në shkolla anekënd Kosovës, tha kryeministri Kurti.

Ndërkaq, Ministrja Rizvanolli theksoi se investimet në projekte të tilla do të vazhdojnë edhe në të ardhmen, duke nënvizuar rëndësinë e efiçiencës së energjisë.

“Kënaqësi të shohim efektet e punës tonë, ku nga fillimi i këtij mandati kemi theksuar se kursimi dhe rritja e efiçiencës së energjisë janë shtylla kryesore të Strategjisë sonë të Energjisë. Kjo na mundëson jo vetëm uljen e faturave, por edhe përmirësimin e kushteve për nxënësit dhe mësimdhënësit, si dhe për mijëra pacientë dhe qytetarë në mbarë vendin,” tha ajo.

U.D. drejtoresha e FKEE-së, Ardiana Bokshi, tha se projekti është zbatuar me qëllim të përmirësimit të kushteve të mësimdhënies dhe mësimnxënies, si dhe për rritjen e kursimit të energjisë.

Kurse, kryetari i Komunës së Podujevës, Shpejtim Bulliqi, vlerësoi se këto investime kanë ndikuar drejtpërdrejt në përmirësimin e infrastrukturës shkollore, duke përmendur edhe investime të tjera të realizuara në shkollat e komunës gjatë viteve të fundit.

Edhe drejtori i Shkollës së Mesme Ekonomike “Isa Boletini”, Muhamet Sejdiu, tha se këto investime kanë qenë të domosdoshme dhe kanë dhënë rezultate konkrete në përmirësimin e kushteve infrastrukturore të shkollës.