Fushëveprimi i Ministrisë së Ekonomisë

Fushëveprimi i Ministrisë së Ekonomisë (ME) mbështetet në Rregulloren Nr. 14/2023 për Fushat e Përgjegjësisë Administrative të Zyrës së Kryeministrit dhe Ministrive dhe ka përgjegjësitë kryesore në hartimin dhe zbatimin e politikave publike, akteve ligjore dhe akteve nënligjore në fushat e energjisë, minierave, komunikimeve elektronike, teknologjisë së informacionit dhe ekonomisë digjitale, duke siguruar gjithashtu përafrimin me legjislacionin e BE-së dhe konventat ndërkombëtare përkatëse.

Ministria e Ekonomisë ka përgjegjësinë për përcaktimin e standardeve të detyrueshme në këto fusha dhe për zbatimin e politikave dhe legjislacionit të lidhur me energjinë, minierat, sektorin postar dhe komunikimet elektronike, duke u siguruar që të jenë në përputhje me ligjin në fuqi.

ME përcakton gjithashtu objektivat dhe masat politike për efiçiencën e energjisë dhe promovimin e burimeve të ripërtëritshme të energjisë. Mbështet zhvillimin e tregut të lirë dhe liberalizimin e shërbimeve publike, duke inkurajuar futjen e kapitalit privat në sektorët publik. Ministria asiston Qeverinë në ushtrimin e të drejtave të Aksionarit dhe kryeson Komisionin Ministror për Ndërmarrjet Publike, ndërsa mbikëqyr dhe vlerëson Bordet e Drejtorëve të Ndërmarrjeve Publike, duke u siguruar që ato të funksionojnë sipas ligjit.

Në fushën e energjisë, Ministria përcakton dhe monitoron caqet e dekarbonizimit dhe harton planet e veprimit për realizimin e tyre. Monitoron sistemet e energjisë dhe menaxhon situatat emergjente që lidhen me sigurinë e furnizimit me energji, duke siguruar zbatimin e rregullave dhe standardeve teknike ndërkombëtare. Ministria gjithashtu koordonon dhe mbikëqyr implementimin e projekteve në fushën e burimeve të ripërtëritshme të energjisë dhe përfaqëson Qeverinë në organizatat ndërkombëtare dhe rajonale për sektorët e energjisë, minierave dhe TIK.

Për më tepër, Ministria realizon mbikëqyrjen administrative të zbatimit të akteve ligjore dhe nënligjore në fushën e energjisë dhe burimeve të ripërtëritshme dhe është përgjegjëse për negociatat dhe implementimin e marrëveshjeve ndërkombëtare. Ajo promovon bashkëpunimin rajonal në fushën e energjisë, minierave dhe TIK-ut dhe përfaqëson sektorët përkatës brenda dhe jashtë vendit. Ministria gjithashtu propozon listën e rentave minerare për aktivitete të licencuara për shfrytëzimin e resurseve minerale dhe shqyrton pëlqimet për planet hapësinore dhe urbanistike.

Sa i përket menaxhimit të resurseve minerale, Ministria miraton planet vjetore për menaxhimin e tyre, identifikon zonat minerare me interes të veçantë dhe kryen hulumtime gjeologjike, duke mbledhur dhe përpunuar të dhënat gjeo-shkencore për resurset e Kosovës.

Ndërkaq, në fushën e TIK-ut, Ministria zhvillon dhe përkrah sektorin, veçanërisht tregtinë elektronike, identifikimin elektronik dhe sigurinë e sistemeve të informacionit, duke mbështetur gjithashtu teknologjitë e reja si Artificial Inteligence, Internet of Things, Big Data dhe Virtual Reality.Virtual.

Si përfundim, Ministria administron dhe mirëmban sisteme të rëndësishme si Sistemin e Identifikimit dhe Nënshkrimit Elektronik, Sistemin e Atllasit Elektronik, dhe Rrjetin e Hulumtimit dhe Edukimit të Kosovës (KREN), ndërsa kryen edhe detyra të tjera të përcaktuara me legjislacionin përkatës në fuqi.