Vjenë, 20.06.2022 – Zëvendësministri i Ekonomisë, Mentor Arifaj ka marr pjesë në  tryezën(takimin) e organizuar nga Sekretariati i Komunitetit të Energjisë i cili takim u mbajt në Vjenë të Austrisë, ku të pranishëm ishin Mechthild Wörsdörfer, Zëvendës Drejtor Gjeneral nga Komisioni Europian, Artur Lorkowski, Drejtor i Sekretariatit të Komunitetit të Energjisë, si dhe përfaqësues të shteteve nënshkruese të Komunitetit të Energjisë.

Zv. Ministri Arifaj para të pranishmëve tha se përkundër faktit se Kosova është një vend me varësi nga burimet e energjisë fosile ne si shtet vazhdimisht kemi shprehur gatishmërinë për tu lidhur me vendet e rajonit për të ecur përpara drejt një procesi gradual të dekarbonizimit, duke u bazuar në parimet e përcaktuara nga Deklarata e Sofjes dhe platforma energjisë së pastër të miratuar nga Këshilli Ministror në nëntor të 2021.

“Kohëve të fundit ne si shtet kemi qenë mjaft aktiv në zhvillimin e sektorit të energjisë si dhe kemi dhënë kontributin tonë në procesin e studimit të fundit të financuar nga Komisioni Evropian ku pas analizave të bëra dolëm me një objektiv mjaft ambicioz me çka synohet pavarësia nga linjiti dhe të rrisim burimet e energjisë së ripërtëritshme në 32 % të konsumit bruto të energjisë elektrike deri në vitin 2030 ”, tha Arifaj. 

Tutje zv.ministri Arifaj potencoi se për dallim nga proceset e mëparshme në përcaktimin e caqeve kësaj here Kosova është në një momentum më të përshtatshëm duke iu falënderuar Strategjisë Kombëtare të Energjisë 2022 – 2031 e cila është drejt finalizimit.