Prishtinë, 06.02.2013 – Zëvendësministri i Zhvillimit  Ekonomik  Ramadan Hasani ka pritur në një takim një delegacion të Komunës së Bujanocit të kryesuar nga ndihmësi i kryetarit të Komunës  së Bujanocit, Nexhat Behluli.

Me këtë rast zv.ministri Hasani është shprehur i gatshëm që t’i përkrah dhe t’i ndihmojë qytetarët e tri komunave shqiptare me theks të veçantë në problemin me policat e sigurimit kufitar dhe për plasimin e produkteve nga tri komunat  në tregun e Kosovës . “ I kuptojmë problemet  që kanë komunat shqiptare por do të mundohemi që përmes Byros Kosovare të Sigurimit që të minimizojmë tarifën ”, ka pohuar zv.ministri Hasani.

Numri dy i MZHE-së Ramadan Hasani ka   pohuar se MZHE do të ketë angazhim serioz për të siguruar plasimin e produkteve të tri komunave shqiptare në tregun e Kosovës.

“Sa  i përket  plasimit  të produkteve nga tri komunat shqiptare në tregun kosovar ne do të angazhohemi që të ndihmojmë duke zhvilluar takime me përfaqësuesit e AKB- së  dhe OEK-ut  si dhe me tregtarët e Kosovës “ ka thënë zv.ministri Hasani.

Ndërsa,  Nexhat Behluli ndihmës i kryetarit të Komunës së Bujanocit u shpreh se qytetarët e komunave shqiptare po përballen  me situatë të rëndë politike dhe ekonomike gjendje kjo e cila po detyron  banorët e asaj ane të zhvendosen.