04.04.2025, Prishtinë – Zëvendësministri i Ekonomisë, Getoar Mjeku dhe drejtori i departamentit të TIK-ut në ME, Agim Kukaj kanë marrë pjesë në organizimin “DigiDay Prishtina 2025”, e ku është diskutuar tema “Zgjidhje inovative për Administratën Publike në Austri-Kosovë”.

Me këtë rast, zëvendësministri Mjeku përmendi investimet në përmirësimin e infrastrukturës së përgjithshme dixhitale.

“Ministria e Ekonomisë ka investuar në përmirësimin e infrastrukturës së përgjithshme dixhitale, duke përfshirë internetin me shpejtësi të lartë dhe rrjetet celulare në të gjithë vendin. Angazhimi ynë për zhvillimin e infrastrukturës së TIK-ut është i dukshëm në strategjitë kombëtare dhe partneritetet me organizatat ndërkombëtare që synojnë të përmirësojnë lidhjen dixhitale. Kosova ka 99.8 % penetrim të brezit të gjerë, duke u renditur ndër kampionët më të mirë në fjalë”, tha ai.

Zëvendësministri tha se teknologjia e informacionit dhe komunikimit janë segment i rëndësishëm falë të rinjve të cilët po drejtojnë kompani të suksesshme dhe po krijojnë vende pune, teksa shtoi se 70 për qind e kompanive të TIK-ut në Kosovë eksportojnë shërbime.

Ndërsa, drejtori i Departamentit të TIK-ut në ME, Agim Kukaj tha se vetëm gjatë vitit 2024, janë eksportuar shërbime të teknologjisë informative në vlerë 347.4 milionë euro, e që krahasuar me vitin 2023, ka pasur rritje për 21%.

Tutje ai tha se përhapja e përdorimit të internetit tek popullsia në Kosovë është 96.6%. Drejtori Kukaj tha se synojnë që deri në vitin 2030, Kosova të bëhet një vend me ekonomi të digjitale të avancuar, qytetarët e së cilës do të përdorin mjetet digjitale dhe shërbimet elektronike të sigurta.

Kjo ngjarje u organizua nga Advantage Austria me temën “Zgjidhjet inovative për administratën publike në Austri e Kosovë”. Në hapje të ngjarjes mori pjesë edhe ambasadori austriak në Kosovë, Georg Schnetzer.