Punëtoria po mbahet në kuadër të bashkëpunimit me qeverinë e Kanadasë dhe përfshin grupin ndërinstitucional që do të përgatisë rishikimin e Strategjisë Minerare të Republikës së Kosovës.

Zëvendësministri Mjeku falënderoi partnerët kanadezë për përkrahjen përmes ekspertizës, e cila po ndihmon zhvillimin e sektorit minerar në Kosovë dhe forcimin e marrëdhënieve ekonomike me vendet që ndajnë vlerat tona demokratike.

Ambasadorja Blitt theksoi rëndësinë e punëtorisë dhe shprehu besimin që edhe në të ardhmen do të vazhdojë bashkëpunimi mes dy vendeve tona, veçmas në sektorin e minierave.

Punëtoria do të zgjasë tri ditë dhe do të përqendrohet në përvojat e hartimit të politikave minerare.

Punëtoria po organizohet në kuadër të projektit “Mekanizmi i Dërgimit të Ekspertëve për Partneritet të Asistencës Teknike” të qeverisë së Kanadasë. Projekti po mbështet Republikën e Kosovës në rishikimin dhe përmirësimin e strukturës institucionale dhe politikave të sektorit minerar, me synim rritjen e investimeve dhe zhvillimin e qëndrueshëm me ndjeshmëri mjedisore dhe shoqërore.