MEA dhe JICA flasin për zhvillimin e projekteve të mbështetura nga Agjencia Japoneze
Prishtinë, 06.10.2020 – Sekretari i Përgjithshëm i Ministrisë së Ekonomisë dhe Ambientit, Fatos Qerimi dhe Shefi i Kabinetit të Ministrit, Bedri Berisha, sot zhvilluan një takim virtual me zyrtarë të Agjencisë Japoneze për Bashkëpunim Ndërkombëtar (JICA).
Zyrtarët e JICA-s prezantuan mbështetjen që i është dhënë Republikës së Kosovës në shumë fusha, duke përfshirë edhe projektin i cili është në zhvillim e sipër “Zhvillimi i Kapaciteteve për Kontrollin e Ndotjes së Ajrit në Republikën e Kosovës”, ku nga ekspertët e JICA-s u prezantuan të arriturat e këtij projekti.
Po ashtu u ritheksua se për shkak të pandemisë Covid-19, është e pamundur që të vijnë ekspertët e JICA për përfundim të projektit të lartëpërmendur, kështu që MEA dhe JICA u dakorduan për zgjatjen e projektit deri në përmirësimin e gjendjes nga kjo pandemi.
Sekretari i Përgjithshëm i MEA-së, Fatos Qerimi i ofroi mbështetje ekspertëve të JICA-së për finalizimin e projektit dhe iu falënderua JICA-s për gjithë mbështetjen e dhënë, me shpresë për bashkëpunimin të mëtutjeshëm edhe në të ardhmen.